| Q師傅：
Q師傅你好！
我係一個中五重讀男生。我其實睇o左Q師傅個網站好耐，諗o左好耐，終於都係寫o左哩封信。
入正題先，我所講耿耿於懷的事，要追溯返小學，再到中三o個一年。我的問題比較特別，似乎好少人會同我有同一情況。就係我由細到大都好中意「問o野」。
小學o個時，學校老師因為我成日問問題的關係，就限制我每日只可以問3條問題。而平時o係屋企做功課，問我哥哥問題亦都問到佢煩，甚至問到佢崩潰同喊。可想而知我o既問o野威力有幾咁強。o個陣時我見到個個都比我整到咁辛苦，就開始唔再問o野。但係過程十分之痛苦，有o野唔明都唔問、唔出聲。
直到中三o個年，我又復發起來。可能因為我覺得要問，D o野先會識，成績先會好啦！但係o個時換o黎o既係比同學排斥、呵責。o個陣時都有反省過，問過佢o地我有咩問題，佢o地同我講我問埋D o野好無聊，同埋唔明點解咁多o野問，仲有阻住佢o地上堂，好煩之類。
咁我o個時o既解決方法就係落堂先問，咁就唔會阻到佢o地，但依然畀同學每日走埋我身邊潤我幾句話：「又扮乖呀？」、「又扮好學呀？」等等……
直至今日o既我，先發覺我o既問題根本唔係出於我發問o既內容，而係解決方法。o個時o既諗法就係：「唔識就問，睇書都唔會明，因為本書o既內容唔可以針對到我問o既o野。」依家o既諗法係：「唔識，可以睇o左書先，書入面無直接針對我問o既o野，但係概念之類可以幫我解決到問o既o野。唔明先再問老師，而唔係一唔識就係咁問人。」
後來，我成日諗返轉頭，如果o個時人o地同我講：「你個問題唔係出o係你問o既問題無聊定唔無聊，而係個解決方法。」就唔洗痛苦o左十幾年，日日比人排斥。雖然我同自己講，望番轉頭都冇用，人應該係向前望。但我又好怕將來遇到問題，又係搞唔清問題出o係邊，誤會o左，浪費D精神、心機、時間係一個無用o既解決方法上面。
其實我明件事已經過o左去，但係唔知點解我對於未來會遇到o既困難，會覺得好恐懼，對自己解難能力好無信心，係咁諗自己又會搵錯方法解決，諗唔到核心。就算搵人幫手，自己都會講唔清自己問題o係邊，令人o地指唔出一個正確o既方法幫自己。
總之個感覺就係好驚，我有時會因為成日諗哩D o野，搞到覺都訓唔到，返學上堂唔專心，我明白自己作為一個重讀生，唔可以再衰多次o係情緒問題上。其實我依家想點都唔知，唔知Q師傅有冇咩意見可以比到我呢？謝謝！
Johnny 上 |